Zer da Argitzen?
2023an D2030 sareak eskualdean energia trantsizioaren inguruan adostasunak lantzeko prozesu bat abiatzeko proposamena egin zuen. Honen ondorio da Argitzen. Hemen ikus ditzakezu orain arte emandako urratsak.
Debagoienean energia trantsizioaren inguruan eman nahi ditugun urratsak argitzen hastera goaz!
Zergatik?
- Energia eskualdearen etorkizuneko bizigarritasunaren oinarrietako bat delako.
- Arlo ezberdinetako eragile eta herritarrei eragiten dielako.
- Etorkizuna baldintzatuko duten erabaki estrategikoak hartu beharrean gaudelako.
- Elkarrizketa hau eskualde mailan ere eman behar delako.
- Helburu amankomunak ezarri nahi ditugulako, kontsentsu zabaletan oinarrituak.
- Herritar eta eragileek energia trantsizioaren baitan beren ardurak hartzea nahi dugulako, prozesuan zehar ahaldunduz.
- Energia kopuru altuak erabiltzen ditugulako egungo gure bizimoduan eta Lurrak dauzkan mugen gainetik bizi garelako.
Nola?
- Mahai sektorialak: energia trantsizioan eman beharreko urratsarekin lotura duten eragileez osatutakoak. Eskualdeko eragileak energia trantsizioaren inguruan ahaldundu eta aktibatzeko helburua dute. Gogoeta partekatua egingo da beraiekin eta emaitzak prozesuan txertatuko dira.
- Herritarren Batzarra: zozketa bidez aukeratutako herritarrek prozesuaren galderaren inguruan ezagutza jaso, gogoeta partekatua egin eta gomendio-sorta bat osatu beharko dute.
- Mandatu organoko kideek, Herritarren Batzarrak egindako gomendioak aztertu, horien inguruan gogoeta partekatua egin eta erantzuna emango diete.
- Sektore publiko, pribatu eta komunitarioko eragileen, eta herritarren, arteko lankidetzan ari gara lanean.
- Kontsentsu zabaletan oinarritutako helburu amankomunak ezarri nahi ditugu.
Mandatu organoa
Gogoeta partekaturako prozesu honen sustatzaile eta erabakigune nagusia da, eta berea da gomendioei erantzuna emateko ardura. Herritarren Batzarraren eskutik jasoko duten gomendio-sorta sakon aztertu eta gomendioei erantzuteko soluzioak adostasunetik eraikitzeko prozesua egingo dute.
Sektore publiko, pribatu eta komunitarioko 18 eragilek osatzen dute eta prozesua bideratzen ari dira, lankidetzan.
2023an D2030 sareak eskualdean energia trantsizioaren inguruan adostasunak lantzeko prozesu bat abiatzeko proposamena egin zuen. 2024ko apirilera bitarte aurretiko fase bat garatu da prozesuaren oinarriak ezartzeko eta bertatik eratu da Argitzen prozesuaren ardura hartu duen talde sustatzaile hau, lankidetza publiko-pribatu-komunitarioa oinarrian duena.
